भोजपुर । जिल्लामा पछिल्लो समय भएका श्रृंखलाबद्ध घटनाका दोषी जोगाउन लागेको भन्दै विद्यार्थीहरूले विरोध जनाएका छन् । अपराधिक घटनाको अनुसन्धान र अपराधीमाथि कारबाही गर्न जिल्ला प्रहरी प्रमुख डीएसपी शरदकुमार थापा क्षेत्री उदासीन देखिएको भन्दै विद्यार्थीले भोजपुर सदरमुकाममा प्रदर्शन गरेका हुन् ।
भोजपुर बहुमुखी क्याम्पसका विद्यार्थीहरूले राजनीतिक दबाबमा अपराधीहरू उम्काउन खोजिएको भन्दै शान्ति सुरक्षा र पीडितलाई न्यायको माग गरे । असार २२ गते टक्सारका विद्यार्थी दीप्सन प्रधानको अखुवा खोलामा भएको हत्यामा संलग्नहरूलाई उन्मुक्ति दिन खोजेको भन्दै उनीहरूले ध्यानाकर्षण गराएका छन् । दीप्सनको हत्यामा संलग्न सबैलाई कारबाही गर्न विद्यार्थीले माग गरेका छन् ।
घटना वारदातमा सँगै रहेकाहरूलाई कारबाही नगरी एकजनालाई मात्र मुख्य दोषी बनाई उन्मुक्ति दिन खोजेर घटना तोडमोड गर्न खोजिएको भन्दै दीप्सनका बुबा देविप्रसादले समेत आक्रोश पोखेका छन् । घटनामा संलग्न सुमन श्रेष्ठ भाइ विनम डीएसपीकै भान्से भएकाले दाजुलाई उन्मुक्ति दिन खोजिएको स्थानीय र आफन्तको भनाइ छ ।
मंगलबार तीनवटा घटनाका पीडितहरूले जाहेरी लिन नमानेको, दोषी किटान गर्दा पनि बेवास्ता गरेको गुनासोसहित पत्रकार सम्मेलन गरेका थिए ।
पीडितले मुख खोलेपछिको पराकम्प पक्राउ परे तीनजना पक्राउ
टेम्केमैयुङ गाउँपालिकाको राउते खोलामा पक्की पुल बनाइरहेको ठाउँमा खटिएका सब इन्जिनियर मन्दीप राईको रहस्यमय मृत्युको घटनामा संलग्न आरोपमा प्रहरीले गएराति ३ जनालाई नियन्त्रणमा लिएको छ । गत जेठ ३१ गते बाढी आइरहेको बेला स्काइभेटर साइड लगाउन पठाएर आफ्नो छोरालाई कर्तव्य गरी मारेको भन्दै बुबा ईश्वरकुमार राईले किटानी जाहेरी दिएका थिए । असार १३ मा डीएसपी क्षेत्रीले जाहेरी दर्ता गर्न नमानेपछि २८ गते सरकारी वकिलको कार्यालयमार्फत् जाहेरी दिइएको थियो ।
नागरिक समाज, पीडित परिवारले दबाब दिएपछि प्रहरीले स्काभेटर अपरेटर सम्राट केसी, सहअपरेटर विष्णु भुजेल र पेटी ठेकेदार बालम राईलाई पक्राउ गरेको हो । मन्दीपका बुबाले भने चौतर्फी दबाब दिएपछि पक्राउ गरिएको भएपनि अझै अनुसन्धान प्रभावकारी हुन्छरहुन्न भन्नेमा आफूहरू आशावादी हुन नसक्ने प्रशस्त आधार रहेको बताएका छन् ।
