भोजपुर । भोजपुरमा लोपन्मुख संरक्षित रेडपाण्डा (हाब्रे) को संरक्षण अभियान सुरु गरिएको छ । भोजपुरको उत्तर पश्चिमी भेगका विभिन्न मुख्य वन क्षेत्रमा पाईने रेडपाण्डा संरक्षणका लागि टेम्केमैयुङ गाउँपालिका र साल्पासिलिछो गाउँपालिकाका केहि वडामा कार्यक्रम सुरु गरिएको हो ।
विशेषगरि घना वनजंगल क्षेत्रमा रेडपाण्डा पाइने यसको संरक्षणका लागि टेम्केमैयुङ गाउँपालिका वडा नं. १, तिम्मा र साल्पासिलिछो गाउँपालिका वडा नं. ५, दोभानेमा कार्यक्रम थालिएको सामूहिक अभियान भोजपुरका अध्यक्ष गणेश श्रेष्ठले बताए । ‘रेडपाण्डा एकदमै दुर्लभ संरक्षित जंगली जनावर भएकाले पनि यसको संरक्षणका लागि हामीले रेडपाण्डा फेला पारिएको टेम्केमैयुङ र साल्पासिलिछो गाउँपालिकाका वडा क्षेत्रमा यो कार्यक्रम सुरु गरेका हौँ’ उनले भने ।

विशेषगरि घना वनजंगल क्षेत्रमा रेडपाण्डा पाइने यसको संरक्षणका लागि टेम्केमैयुङ गाउँपालिका वडा नं. १, तिम्मा र साल्पासिलिछो गाउँपालिका वडा नं. ५, दोभानेमा कार्यक्रम थालिएको छ

रेडपाण्डा नेटवर्कसँगको समन्वयमा सामूहिक अभियान भोजपुरले ती क्षेत्रमा रेडपाण्डा संरक्षण अभियान सुरु गरेको हो । संसारमै दुर्लभ मानिएको रेडपाण्डा भोजपुरको उत्तरी साल्पासिलिछो, षडानन्द नगरपालिका र टेम्केमैयुङका विभिन्न वन क्षेत्रमा पाईने गरेको छ ।
टेम्केमैयुङ गाउँपालिकाको मुन्दुम पदमार्गमा पर्ने वन क्षेत्रहरूमा रेडपाण्डा पाईन्छ । टेम्केमैयुङ गाउँपालिकाको तिम्मा सुम्लिखाको धप्पर एकराते सामुदायिक वन क्षेत्रमा सामूहिक अभियान संस्थाका समुदायमा आधारित रेडपाण्डा संरक्षण कार्यक्रमका फिल्ड कर्मचारीहरूले रेडपाण्डाको प्रमाण तश्विर समेत खिचेको अध्यक्ष श्रेष्ठले बताए ।
रेडपाण्डा संरक्षणका लागि सम्बन्धित निकायहरुसँग जिल्ला तहमा अन्र्तक्रिया तथा छलफलका कार्यक्रमहरू समेत सञ्चालन हुँदै आईरहेको संस्थाका महासचिव गणेश प्रधानले सुनाए । उनका अनुसार सामुदायिक वनसँगको साझेदारीमा समुदायमा आधारीत अभियान सञ्चालन भएको छ । रेडपाण्डा संरक्षणका लागि डिभिजन वन कार्यालय भोजपुर र सम्बन्धित सामुदायिक वनसँग सहकार्य गरिने उनले जानकारी दिए ।