भोजपुर । स्थानीय टुँडिखेलमा सञ्चालन भएको दोस्रो मेयर कप आमन्त्रित अन्तरपालिका पुरुष भलिबल प्रतियोगिताको उपाधि भोजपुरको षडानन्द नगरपालिका हात परेको छ । शनिवार भएको फाइनल खेलमा षडानन्द नगरपालिकाले जिल्लाकै रामप्रसाद राई गाउँपालिकालाई लगातार २५–२३, २५–१७ र २५–२२ सेटले हराउँदै विजेता बनेको हो ।
शनिवार नै भएको सेमिफाइनल खेलमा कोशी प्रदेश प्रहरी कार्यालय बिराटनगरलाई पराजित गर्दै षडानन्द नगरपालिका र दोस्रो खेलमा भोजपुर नगरपालिकालाई हराउँदै रामप्रसाद राई गाउँपालिका फाइनलमा प्रवेश गरेको थियो । भोजपुर नगरपालिकाको मुख्य प्रायोजनमा सञ्चालित प्रतियोगिताको विजेता षडानन्द नगरपालिकाले नगद एक लाख २० हजार हात पार्‍यो भने उपविजेता रामप्रसाद राई गाउँपालिकाले नगद ६० हजारमा नै चित्त बुझाएको छ ।
यस्तै सेमी फाइनललिष्ट कोशी प्रदेश प्रहरी कार्यालय बिराटनगर र भोजपुर नगरपालिकाले नगद ३० हजार प्राप्त गरेको छ । प्रतियोगिताका सर्वोकृष्ठ खेलाडीलाई नगद १० हजार, उत्कृष्ट स्पाइकर, उत्कृष्ट ब्लकर, उत्कृष्ट सेटर, उत्कृष्ट सर्भरलाई नगद चार–चार र सहभागी टिमहरूलाई पनि नगद १० हजार प्रदान गरिएको आयोजक जिल्ला भलिबल सङ्घका महासचिव सङ्ग्राम किराँतीले जानकारी दिनुभयो ।
प्रतियोगितामा नेपाली सेनाको भोजपुरमा रहेको श्रीनयाँ श्रीनाथ गण, कोशी प्रदेश प्रहरी कार्यालय बिराटनगर, भोजपुर नगरपालिका, षडानन्द नगरपालिका, अरुण गाउँपालिका, टेम्केमैयुङ गाउँपालिका र रामप्रसाद राई गाउँपालिका गरी सात टिमले सहभागिता जनाएको थियो ।