विराटनगर । भोजपुर नगरपालिका वडा नम्बर १२ का वडाअध्यक्ष देवीप्रसाद कार्की पक्राउ परेका छन् ।
अपराध अनुसन्धान महाशाखा प्रदेश १ (रिट) को टोलीले उनलाई आइतबार साँझ वडा कार्यालयबाटै पक्राउ गरेको हो । कार्कीविरुद्ध इलाका प्रहरी कार्यालय विर्तामोडमा बैंकिङ कसुरअन्तर्गत किटानी जाहेरी परेको प्रहरिले बताएको छ ।
कार्कीले उद्योग वाणिज्य संघ विर्तामोडका अध्यक्ष प्रकाश शिवाकोटीलाई ५८ लाखको चेक दिएका थिए । स्काभेटर किनेबापत कार्कीले दिएको उक्त चेक भुक्तानीका लागि पटक-पटक जाँदा पैसा नभएको भन्दै नसाटिएपछि शिवाकोटीले उजुरी दिएको प्रदेश १ प्रहरी प्रवक्ता प्रहरी उपरीक्षक नविन राईले बताए ।
‘चेक बाउन्समा आएको उजुरीको आधारमा बैकिङ कसूरअन्तर्गत उहाँलाई पक्राउ गरेका हौं’, एसपी राईले बताए ।
अपराध अनुसन्धान महाशाखाको टोलीले कार्कीलाई इलाका प्रहरी कार्यालय विर्तामोडमा बुझाएको छ ।
नेपाली कांग्रेसबाट निर्वाचित कार्की ठेकेदारसमेत हुन्।
