विराटनगर । यसवर्षको षष्टिका बस्नेत सूचनाको अधिकार पुरस्कार पत्रकार किशोर बुढाथोकीलाई प्रदान गरिने भएको छ ।
महासंघ मोरङ अध्यक्ष सुशीला पाठकको अध्यक्षतामा शुक्रबार बसेको महासंघको तेस्रो बैठकले उक्त पुरस्कार बुढाथोकीलाई प्रदान गर्ने निर्णय लिएको हो ।
उक्त पुरस्कार प्रत्येक वर्ष नेपाल पत्रकार महासंघको स्थापना दिवसको अवसरमा वितरण गर्ने गरिन्छ । नेपाल पत्रकार महासंघ मोरङ शाखाले प्रदान गर्दै आएको पुरस्कारको राशि १ लाख १ सय रूपैयाँ रहेको छ ।
अन्नपूर्ण पोस्टका कोशी प्रदेश ब्युरो प्रमुखसमेत रहेका बुढाथोकी विगत १३ वर्षदेखि सूचनाको हकको क्षेत्रमा क्रियाशील छन् ।
भोजपुरको षडानन्द नगरपालिका–८ तुङ्गेछा घर भएका बुढाथोकी २ दशक अघिदेखि पत्रकारितामा सक्रिय छन् । संखुवासभाबाट पत्रकारिता सुरु गरेका बुढाथोकी २०६८ सालदेखि विराटनगरमा रहेर पत्रकारिता गर्छन् ।
नेपाल पत्रकार महासंघको ७०औं स्थापना दिवसको अवसर पारेर शनिबार उक्त पुरस्कार वितरण गरिने नेपाल पत्रकार महासंघ मोरङका सचिव नेत्र पी अधिकारीले बताए । उनका अनुसार षष्टिका बस्नेत सूचनाको अधिकार पुरस्कार सिफारिस समितिको सिफारिसका आधारमा पुरस्कार वितरणको निर्णय गरिएको हो ।