काठमाडौं । सरकारले यसै आर्थिक वर्षभित्र कम्तीमा ५०० उद्यमीलाई स्टार्टअप कर्जा दिने भएको छ । बिहीबार प्रतिनिधिसभा बैठकमा सांसदहरूका प्रश्नको जवाफ दिने क्रममा प्रधानमन्त्री केपी शर्मा ओलीले युवाहरूलाई उद्यमशील बनाउन सहुलियतपूर्ण ऋण योजनाको प्रक्रिया अन्तिम चरणमा पुगेको जानकारी दिए ।

“अहिले युवाहरूलाई रोजगारीका लागि मात्रै होइन, उद्यमशीलताका लागि पनि कुरा गरिरहेका छौं । हामी उद्यमशील हुन सिकाइरहेका छौं र यसमा मद्दत पनि गरिरहेका छौं । उद्यमशील हुन आवश्यक पर्ने आर्थिक र प्राविधिक प्रबन्धको कुरा होस् वा अन्य कुराहरू, सरकारले सघाइरहेको छ । सस्तो ब्याजदरमा ऋण लिने अवसर र स्टार्टअप सुरु गर्ने जस्ता पहलहरू उपलब्ध गराइरहेको छ,” प्रधानमन्त्रीले भने ।

प्रधानमन्त्री ओलीले देशभित्रै उत्पादन र रोजगारी सिर्जना गर्न राष्ट्रिय श्रम तथा रोजगार सम्मेलन सम्पन्न गरिएको उल्लेख गरे । उनले नवप्रवर्तनलाई प्रोत्साहन गर्ने नीति अवलम्बन गर्दै स्टार्टअपलाई विशेष प्राथमिकता दिइएको बताए ।

विदेश पलायनको बढ्दो प्रवृत्तिप्रति आफ्नो धारणा राख्दै उनले युवाहरूको विदेश जाने चाहनालाई नकारात्मक रूपमा मात्रै नबुझ्न आग्रह गरे । उनले रोजगारी, व्यवसाय वा अध्ययनका लागि विकसित देशहरूमा जाने प्रवृत्ति विश्वव्यापी भएको र यसलाई रोक्नुभन्दा स्वदेशमै रोजगारीका अवसर सिर्जना गर्न आवश्यक रहेको बताए ।